منتديات قمة ليبيا | Top-Libya


تم إفتتاح المنتدي من جديد

الرجاء الإطلاع على الموضوع الموجود هنــــــا

تحياتي,

منتديات قمة ليبيا | Top-Libya


 
الرئيسيةالبوابةس .و .جبحـثالتسجيلالأعضاءالمجموعاتدخول

شاطر | 
 

 اطيب شعب واطيب حكومة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
منيرة
النائب العام للإدارة
النائب العام للإدارة
avatar

عدد الرسائل : 106
السٌّمعَة : 18
نقاط : 33314
تاريخ التسجيل : 30/11/2008

مُساهمةموضوع: اطيب شعب واطيب حكومة   الخميس 9 يوليو - 18:23:55

الحمدلله والصلاة والسلام على رسول الله وعلى آله وصحبه أجمعين

السلام عليكم ورحمة الله وبركاته،،

كيف حالك إن شاء الله دائمــاً بخير ؟


اطيب شعب واطيب حكومة

السلام عليكم ورحمة الله

بالامس بلغت بخبر سار لصديق كان يوما قريب ومقرب
قضى فترة لابأس بها في السجون وبعد فتره اكتشفوا
انه هناك غلط في الاسم او الطول او العرض ممكن مش
نفس لون العيون المهم كان هناك غلط مع ان اتذكر تمام
الفترة الذي سجن فيها والمحكمة الذي اجريت له رغم انها
تاخرة شوية لكن عادي شنوا يعني 12 سنه تاخير في عمر
امه عموما حيثيات الحكم بصراحة اقنعتنا بحكم الاعدام
مع ان التهم الموجهة اليه بصراحة رغم انه صديقي الا ان
الاعدام شوية فيه .

وفجأة يطلق سراحة وشوية يلقى من ايقوله ارفع قضية
وعلى من على من حكم عليه بالاعدام ارفع قضية نعم
يا اخي والله العظيم حكومتنا من اطيب الحكومات في
العالم امغير مش فاهمينها بس العيب فينا.

وين الحكومة الي تعترف بخطأها وين الحكومة الي تقلب
180 درجة في افكارها حسب المصلحة ، مصلحة الشعب
طبعا .

وين تلقاء حكومة تحبس ظلم وبعدها اتعوض المحبوس
على كل ليلة في السجن بسعر ليلة في اغلى فندق
خمس نجوم حكومة تهمل وتتسبب في كارثة انسانية
في مستشفى الاطفال وبعدها اتعوض الاطفال بملايين
اصبح اباء كثر تمنوا لو ابنائهم مصابين بالايدز

وين تلقى حكومة تصادر اراضي وبعد ثلاث عقود تعوض بعشرات
اضعاف السعر الاصلي لو هي اشترت
تسلمي تسلمي يا حكومتنا
يا مدلعتنا يا مهنيتنا يا معوضتنا

بس خوكم الزغدة

مشكلته مشكلة زمان ايام الحبوس كنت مؤدب ونسمع في الكلام
الحكومة وايام الايدز كنت كبير على على مستشفى الاطفال
والحاج (الوالد ) الله ايسامحه كملها في وظيفة وعمل تطوعي
يعني لا عمارة ولا ارض نجري على تعويضها

يعني بالعربي طلعنا من المولد بلا حمص باهي عطونا فول قالوا مافيش
يا جماعة الصبر الصبر حكومتنا طيبة وانتم عارفين

نبي حد اندزه للحكومة ويوصل نبوا انقوللهم يا عرب
يا هووووووووه من ايعوض جيل انظلم
من ايعوضنا على جهلنا من ايعوضنا على تخلفنا
من يعوضنا على الفقر من يعوضنا على سنين عجاف
من ايعوضنا على ايام الطوابير امام الافران والجمعيات
من ايعوضنا على عمر راح من دون ما انديروا سيور
نرى الملايين تصرف كتعويضات الله مالا حسد والمهم
الرزق عند ليبي بس هناك كم مليون ليبي محتاج
الي ملاليم يسد به رمق اطفاله .

والمشكلة هناك مثل ليبي قديم يقول

( جيب الفلوس شطاره و صرف الفلوس حضارة )

وطبعا وينا ووين الحضارة التعويضات كلهن راحن
في سيارة همر او مزرعة او شاليه
لافيه مشروع او مصنع ممكن ياكل من وراه كم
اسرة او حتى جامع على روح طفل مات متأثر من مرض الايدز

كانت النتيجة ارتفاع اسعار الذهب والعقار والسيارات الفارهة

حكومتنا طيبة ونحن عارفينها اتحبنا ونحن انحبوها
ومن غير حلفان بس ياريت نلقوا من يسمعنا
مازالت ليبيا ولادة فيها ناس اتفكر مع ان التفكير كان يوما ما تهمة
مازال فيه ناس تقدر اتخطط يبوا نفض غبار الزمن من عليهم

فيه مثل صيني قديم ايقول
لا تعطيني سمكه بل علمني كيف اصيدها
الحل مش في قرض يعطوه في هيئة سيارة نقل ركاب
يعطوها للشباب على اساس شبابنا كلهم سواقة
باهي وين الدكاترة المهندسين والفنيين والمزارعين

شوية مشاريع ممكن اتحرك الساكن مشاريع
مش انا ولا انت اتقول عليهن فيه ناس متخصصة
طبعا اقصد تخصص علمي وليس تخصص خيم تصعيد وكولسة

مشاريع ممكن تخلق فرص عمل امام الالاف من الشباب
نحن مانعرفوش انفكروا انجيبوا حد ايفكرنا مش عيب
فيه دول نجحت ووصلة لمراتب عالية وجابت حد ايفكر
مثل الاماراة العربية فهي خير مثال

يا حكومة طولنا عمرك فكي الحزام خلي البطينة تنزل وتتريح
لو تجنبا البترول بقرارنا طبعا وليس اكراه
اخلقوا فرص عمل الشباب انهد من البطاله والفلس
مشكلتنا الاجتماعية والبيئية والنفسية والجسدية
هي مشكلة في الاساس اقتصادية

ياريت حكومتنا تنسى ان نحن شعب طيب

لا نحن شعب 6 مليون حالة ايدز
نحن شعب كلنا جدودنا كانوا اقطاعيين وعندهم اراضي صادرتوها
نحن شعب فلام ولباز وكنا كلنا في يوم ما ارهابيين
والله نحن شعب طيب وراقد ريح كلمه طيبة اتشيله وكلمة شينه اتهده

لا اتعبوا روحكم لا اتقسموا الثروة
قصة تبيلها حسبة كبيرة كم جاب البترول
وكم صرفنا على بركينا فاسو
وكم حطينا تعويضات
لا لا خلوا الثروة مكانها
امغير لفته الي الشباب
جيبوا ناس تفهم وتدرس وتلقى حل

فرج راهو طول بالحيل
ايجيبه ربك طيب
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
اطيب شعب واطيب حكومة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات قمة ليبيا | Top-Libya :: القسم الأدبي :: قسم الأدب الساخر-
انتقل الى: